VƏTƏN MÜHARİBƏSİNDƏ QAZANDIĞIMIZ ZƏFƏR TARİXİMİZƏ QIZIL HƏRFLƏRLƏ YAZILDI
3 min read![](https://zirve.info.az/wp-content/uploads/2023/11/Zefer-1764-Nergiz-Qehremenova.jpg)
NƏRGİZ QƏHRƏMANOVA,
AMEA Rəyasət Heyəti Aparatının
İctimaiyyətlə əlaqələr, mətbuat və informasiya şöbəsinin
Elektron informasiya sektorunun müdiri
44 günlük Vətən müharibəsində qazanılmış tarixi Qələbənin üçüncü ildönümü ölkəmizin hər bir bölgəsində təntənəli şəkildə qeyd olunur. Şanlı Zəfər Günü xalqımız tərəfindən böyük coşqu ilə qarşılanır. Üç il əvvəl bu gün Azərbaycan xalqı öz tarixində ən sevincli günlərini yaşayırdı. Müzəffər Ali Baş Komandan, Prezident İlham Əliyevin apardığı uğurlu siyasət və ordumuzun şücaəti nəticəsində Azərbaycan Vətən müharibəsində Zəfər qazandı. Bu Zəfər tariximizin qəhrəmanlıq səhifəsinə qızıl hərflərlə yazıldı.
Ümummilli Lider Heydər Əliyevin əsasını qoyduğu, Prezident İlham Əliyevin sarsılmaz iradə və qətiyyətlə davam və inkişaf etdirdiyi, milli dövlətçiliyin və tam müstəqilliyin təmin olunmasına, iqtisadiyyatın möhkəmləndirilməsinə, regionda ən güclü ordunun qurulmasına, silahlı qüvvələrin modernləşdirilməsinə istiqamətlənmiş bu siyasi kurs ölkəmizin suverenliyinin tam bərpasının həlledici əsasını təşkil etdi. Prezident İlham Əliyevin də bəyan etdiyi kimi, “Azərbaycan bütün dünyaya göstərdi ki, işğal altında olan torpaqlarını öz gücü ilə, öz qüdrəti ilə azad etməyə qadirdir”.
Vətən müharibəsi nəticəsində Azərbaycan beynəlxalq hüququn norma və prinsiplərini, o cümlədən öz ərazi bütövlüyünü, suverenliyini, sərhədlərinin toxunulmazlığını təmin etdi, bununla BMT Təhlükəsizlik Şurasının 4 qətnaməsinin icrasına nail oldu. Vətən müharibəsi dövründə Azərbaycanın qələbələri təkcə döyüş meydanında deyil, eyni zamanda, diplomatiya sahəsində davam etdirildi. Prezident İlham Əliyev müharibə dövründə dünyanın ən böyük media qurumlarına 30-dan çox müsahibə verdi, münaqişə ilə bağlı əsl həqiqətləri beynəlxalq ictimaiyyətə çatdırdı, dünyanın fikrini dəyişdirməyə müvəffəq oldu. Azərbaycan dövləti son 3 ildə ardıcıl olaraq yaxınlaşdığı daha bir məqsədinə də çatdı. Belə ki, 2023-cü il sentyabrın 19-20-də təxminən 24 saat davam edən antiterror tədbirlərində dövlət suverenliyi bütün ərazilərimizdə tam şəkildə bərpa edildi, ermənilərə məxsus təxribatçı hərbi birliklər tərk-silah edildi, onlar torpaqlarımızı tərk etdilər. Bu baxımdan builki bayram bütün ölkə ərazisində daha təntənəli şəkildə qeyd olunur.
Hazırda işğaldan azad edilmiş ərazilərimizin tarixində yeni səhifə açılıb, bu bölgələrdə genişmiqyaslı yenidənqurma və bərpa işləri həyata keçirilməkdədir. Bunlarla yanaşı, alimlərimiz tərəfindən də Qarabağ və Şərqi Zəngəzur iqtisadi rayonlarının təbii və mədəni sərvətlərinin, mövcud bioloji və ekoloji vəziyyətinin öyrənilməsi üzrə multidisiplinar tədqiqatlar aparılmaqdadır. Heç şübhəsiz ki, yaxın zamanda bu bölgələrimizə həyat tam şəkildə yenidən qayıdacaq, bu ərazilər öz inkişaf tempi ilə ölkəmizin ən qabaqcıl bölgələrindən birinə çevriləcək.
8 Noyabr – Zəfər Günündə müstəqilliyimiz, ərazi bütövlüyümüz və suverenliyimiz uğrunda canlarından keçən şəhidlərimizin əziz xatirəsini dərin hörmət və minnətdarlıqla yad edirik. Zəfər Günümüz mübarək!
ZiM.Az